La Orquesta Sinfónica del Principáu, clamiada nel Palau de la Música de Barcelona


La formación asturiana foi ovacionada durante quince minutos tres interpretar el "Réquiem alemán" de Brahms xunto al "Orfeó Català"..

La Orquesta Sinfónica del Principáu d'Asturias (OSPA) vivió'l pasáu domingu, baxo la direición del so titular, Maximiano Valdés, ún de sos mayores éxitos artísticos fuera de la rexón col estrenu nel Palau de la Música Catalana de Barcelona, nun conciertu sinfónico-coral xunto al "Orfeó Català" y actuando como solistes Claudia Barainsky y Sebastian Noack. Nel programa figuró la obra "Un réquiem alemán" de Johannes Brahms.

El conciertu, qu'entamó a las seis de la tarde, escosó les localidaes na histórica sala de conciertos barcelonesa, una de las más relevantes d'España en cuantes a actividá, xunto al Auditoriu Nacional de Madrid, y con una trayectoria centenaria que llevó a los sos ciclos de conciertos a bona parte de los grandes músicos y formaciones qu'encadarmaron la música durante'l sieglu XX y que la tresformaron nun fitu de calter internacional. De fechu, la programación musical de la capital catalana mantien un altísimu nivel tanto na faza operística como na sinfónica. El Palau, obra maestra del modernismu, edificáu pol arquiteutu Lluís Domènech i Montaners ente 1905-1908, foi declaráu en 1997 Patrimoniu de la Humanidá pola UNESCO. Amás, ta acabante someter a un fondu remocicamientu y ampliación d'espacios que camudó de mena bultable l'equipamientu concertísticu.

El Palau ye la sé del "Orfeó Català", agrupación sinfónica cola que la OSPA interpretó'l mesmu programa los pasaos xueves y vienres n'Avilés y Uviéu. A la convocatoria barcelonesa, qu'abrió la xira de la orquesta, asistió Carlos Madera, direutor xeneral de Cultura, en representación del Principáu d'Asturies. Dambes formaciones recibieron tres l'actuación una entusiasta acoyida por parte del públicu, que les ovacionó durante casi quince minutos, amás de clamiar al titular de la formación, Maximiano Valdés, pol escepcional trabayu desendolcáu.

La OSPA rubricó con esti conciertu, que llevantare gran espectación ente los melómanos barceloneses, un éxitu que foi reconocíu, amás de pol públicu, polos responsables del Palau de la Música Catalana como del propiu "Orfeò", qu'esplayaron el porgüeyu de siguir collaborando en futuros proyeutos tanto en Barcelona como n'Asturies.

Los músicos, tres les dos actuaciones ofrecíes n'Asturies, profundizaron nuna versión d'alta ambición y granibles resultaos, tanto pol plantegamientu desendolcáu por Valdés como pola perfeición téunica y entrega profesional qu'ufrieron dambes agrupaciones. D'ehí que lo algamao fuere acordies col esfuerzu previu realizáu. Les llinies xenerales plantegaes por Valdés marcaron claramente un averamientu a la partitura apolíneo, con control dinámicu absolutu y una integración coro-orquesta-solistes d'una contundencia total. Valdés busca nel réquiem brahmsiano un mensaxe éticu que tresciende al propiu fechu relixosu y eso achísbase nuna espresividá que, en determinaos pasaxes de la obra, emociona pol so embaecedor aliendu poéticu, al que s'aporta dende la depuración formal, afuxendo del efectismu y con un desenrollu armoniosu y ordenáu de las estremaes testures melódiques qu'igüen una de les obres corales más céllebres y conocíes de Johannes Brahms.

A la calidá de la versión afaló la magnífica actuación del "Orfeó Català", que dirixe Josep Vila. El coru catalán ye ún de los grupos "amateurs" más interesantes d'España y nesta actuación exhibió una afinación perfeuta, un fraséu impecable y una adecuación estilística qu'asoleyó una preparación téunica notable. Tamién los solistes apurrieron calidá, especialmente'l barítonu Sebastian Noack, con intervenciones sobresalientes, y la sopranu Claudia Barainsky, que se movió por parámetros correutos.

Ayeri, de nuevo coles localidaes escosaes, la OSPA volvió a actuar nel Palau, con un programa sinfónicu, esta vegada con Alberto Varillas como solista. Güei continuará la so xira nacional nos auditorios de Castellón y Zaragoza, onde, asinamesmo, ufrirán dos conciertos sinfónicos nos que'l solista será Oleg Lev, viola principal de la formación asturiana..

Artículu orixinal publicáu en La Nueva España 'l xueves 19 d'Abril de 2005