Fiesta asturiana en Barcelona


El Centru Asturianu de Barcelona nun recula nel so enfotu d'apurrir a esta ciudá la realidá cultural asturiana, siendo ésti un afitáu compromisu de la xunta direutiva presidida por Enrique Delgado Gutiérrez.

Y siguiendo con esi pruyimientu desendolcáronse nes instalaciones del Centru, durante los díes 25, 26, 27 y 28 de payares, la feria de productos asturianos, con enforma éxitu de públicu.

Sería bayuroso enumberar toos y caún d'esos productos, pero ente los más pidíos destacaron, cómo non -cuánta señaldá-, los productos de la tierra y la discografía y la lliteratura asturianes, que de xuru s'atopa en dómina d'espardimientu.

El día 27 visitó les instalaciones del centru'l gran actor asturianu Arturo Fernández, impúsose-y la insinia d'oru del centru, firmando depués nel llibru d'honor, asistiendo a la parvia que darréu se sirvió a tolos presentes.

Asimesmo los díes 27 y 28 tuvo llugar l'actuación de los Hermanos Agüero de Torrelavega. Apinao hasta la bandera p'asistir a un recital enllenu brenga y profesionalidá, non en devanéu Sergio foi campeón absolutu de tonada asturiana nel XI Concursu y Amuesa "Ciudá d'Uviéu", siendo'l so hermnanu Fernando compositor y componente del cuartetu "Voces Peña Sagra".

La festividá de Santa Bárbara foi treslladada a los díes 10 y 11 pa permitir una mayor asistencia de socies y socios.

El día 10 la conferencia "Asturies y la minería" al cargu de José Antonio García Mandoza, inxenieru superior de Mines, de Juan José González Suárez y de Salvador Cascallana, vixilante mineru con experiencia ambute que nos gasayó coles sos anécdotes y traxedies amosándonos una maqueta d'un pozu mineru iguada por él. Too na sala decorada con motivos, fotos y cartelos mineros apurríos pa la ocasión por Hunosa, Muséu de la Minería de L'Entregu y Colexu Oficial d'Inxenieros de Mines del Noroeste. Pa finar, nuevu aperitivu con productos autóctonos de la tierra. El día 11 cellebróse la gran fabada tresnada con procuru con productos tamién llariegos pol nuesu concesionariu señor Ramiro Lasheras.

Nel trescursu de la mesma, el nuestru presidente fizo entrega de la llámpara minera donada xentilmente por Adaro Tecnoloxía a Arturo Pinín González en reconocencia a la so exemplar trayeutoria.

Remató la cellebración coles actuaciones del coru del centru dirixíu por doña Eva Villena con cancios populares asturianos y habaneres y del grupu folk "Risca L'Alba " onde les esplicaciones de l'alumna de la escuela d'asturianía Elena Uría gasayaron a toos.

Como pieslle sonó l'himnu d'Asturies.

El Centru Asturianu de Barcelona dispón d'un portal web acabante inaugurar na direición d'internet: http://www.centroasturianobarcelona.com.

Gonzalo Suárez ye direutivu del Centru Asturianu de Barcelona.

Artículu orixinal espublizáu en La Nueva España 'l Miércoles 29 d'avientu de 2004