EL CENTRU, GÜEI EN DÍA


Gúei ye una asociación abierta a too aquél, asturianu o simpatizante d'Asturies, qu'axunte les condiciones y calteres esixíos pola ñatura los sos fines, ente los que, amás de la xuntura de los asturianos y simpatizantes en Cataluña y n'especial en Barcelona, figuren l'encontu y espardimientu cultural, la práutica d'actividaes educatives, recreatives, benéfiques, deportives..., entamando les seiciones necesaries al efeuto, pero calteniendo destacada atención a los valores y tradiciones asturianos, ensin desdexu del so allugamientu en Cataluña, a la que-y xunen llazos de convivencia y ciñu.

El so domiciliu social ta anguaño na cai Naranjo de Bulnes 1-7 (nome concedío pol Ayuntamientu de Barcelona a pidimientu del Centru) y Ràfols 17-21, nel distritu de Sarriá-Sant Gervasi de Barcelona (D.P. 08034), na finca de 9.600 metros cuadraos qu'alquirió en 1982, sobro la qu'en 1991 iguó dos pistes polideportives, colos sos vestuarios y bar, y más tarde (1995) una piscina semiolímpica y otra infantil o de 'chapuceo'.

Alluga tamién zona de merenderu xunto a una bárbara panera de lo cabero'l s. XVIII, donación del Principáu d'Asturies, y d'un salón polivalente au se desendolquen les actividaes afayadices (representaciones, conferencies, esposiciones, recitales, llacuaes, etc.). La inversión hasta agora realizada pol Centru perpasa los 840.000 euros, 140 millones de pesetes. L'hestóricu local del Paseo Gracia nu 78, onde'l Centru ñació, tuvo de dexase en 31 d'avientu de 2002, con gran dolor y señaldá de los más veteranos socios, debío a que l'añal suba del preciu d'arriendu nun se pudiere sofitar. Afortunadamente, y anque entovía nun se fizo realidá'l nuevu edificiu que dexe fincar toles dependencies proyeutaes, son pocos los güei asociaos que llamenten la mudanza y otros nuevos -mayormente mozos- qu'ingresaron por mor de la mesma. La esperanza de que con brenga y xixa, y della ayuda o sovención oficial, s'algame esi edificiu, ta nel enfotu de los asociaos.