ACTIVIDAES QU'ENCONTA'L CENTRU ASTURIANU


Impartiéronse clases de cocina, de llingua inglesa, de fotografía, de baille, de costura artesana, d'aerobic, de solféu, de gaita y tambor, etc., anque hai que carpir, en xeneral, pola probetaya participación, lo que tamién pasa coles conferencies y charres-coloquiu que periódicamente s'apurren y que cinquen siempre sobre asuntos con porgüeyu social o cultural. Son actividaes, qu'anque paezan ser del porgüeyu d'una minoría, el Centru atalanta qu'hai d'encontales y faceles atrayibles al mayor númberu posible de persones. Asina mesmo convócase un certame añal de poesía y narrativa, espublizándose nel boletín del Centru los trabayos premiaos.

Ente les seiciones que, con más o menos altor según la participación y l'andecha de la camaretada social, vinieron furrulando y nes que tolos asociaos tán envitaos a participar, figuren:

El Coru
La primer agrupación coral del Centru, un animosu septetu que dirixó'l folklorista Modesto González Cobas, nació en 1953 . Más sero, al escomenzar los sesenta, creóse'l Coru del Centru, güei de voces mistes, qu'algamó emportantes gallardones, ente los que destaca'l Primer Premiu de Salto a la Fama pa mases coralesapurríu en 1965 por Televisión Española, quedando ente los tres primeros clasificaos en cuantos conciertos participó hasta la fecha.

Foi dirixíu pol nomáu y polifacéticu Mayestru Juan Díaz de la Campa hasta pocos años enantes del so fallecimientu (en 2003, con más de noventa años), siéndolo anguañu pola Profesora Eva Villena. Representa al Centru Asturianu y por estensión al Principáu, en cuantos certames y festivales ye requeríu, que son abondos, a los que siempres empobina desinteresadamente, actuando amás d'en Barcelona y n'abondes poblaciones de Cataluña, Madrid, Valladolid, Bilbao, Xixón, Uviéu. Contó cola voz del campeón de Tonada Gerardo Orviz hasta qu'ésti en 1987 afincó n'Asturies. Anguañu sigue disponiendo de caledables solistes, como Antonio Soberón, Julio Álvarez y Gonzalo Fernández.

El Cuadru Escénicu
Foi la primer seición que furruló nel Centru. Nos ñicios, por falta de espaciu afayadizu nel local social, representaba les sos obres nel Teatru CAPSA, siendo siempre enforma aplaudíes pola nutrida concurrencia. Especializóse en comedíes costumistes de calter rural asturianu. Foi dirixíu por Enrique Martínez y so esposa Erundina Álvarez, a los que siguió darréu Santiago Álvarez. Dada la edá de los que foron los sos principales componentes, más la desapaición o l'ausencia de dalgunos d'ellos, ye imprescindible qu'otros entusiastes garren l'antorcha del relevu .

El Gupu Foklóricu de Baille y Música Astur
El Grupu Baille anicióse tamién metanes de la década de los sesenta y ta formáu sobremanera por fíos de socioes, munchos nacíos yá fora d'Asturies. Calcao que'l Coru, representa al Centru y a Asturies en cuantos festivales participa. Anque al entamu'l Centru contrató un profesor de baille, somos quien a sostener que los braeros entamadores de la formación del Grupu foron Gerardo Orviz y la so esposa Luz Blanco, col remembráu y escelente gaiteru Manuel García 'Teverga'. Existe Tamién un Grupu Astur de música Folk que ta acabante crear y suena enforma bien.

La Seición Deportiva
Amás de los tradicionales partíos de 'solteros' contra 'casaos' que se cellebren nes fiestes del Centru, hubo un hestóricu equipu fútbol qu'algamó grandes éxitos na década de los setenta . Güei tiense destremáu procuru polos bolos, na modalidá de 'cuatriada', pa la cuala disponse d'una bolera na que se cellebren a lo llargo l'añu dellos campeonatos y concursos nes estayes infantil, xuvenil y senior. La piscina ufre tamién l'amañu de desenrollar actividaes deportives acuátiques pa toles edaes.

El Boletín del Centru
Dende la dómina fundacional vino asoleyándose, con mayor o menor periodicidá, una revista- boletín d'enformación, que, amás d'enformar sobre les actividaes y proyeutos del Centru a socios ya instituciones d'Asturies y Cataluña, se fai ecu de petecibles artículos ufríos por plumes de conocíos escritores y periodistes, o por cenciellos socios aficionaos, yá que'l sociu ye siempre'l primer envitáu a participar nél.